დავით მექვაბიშვილმა რწმუნებათა სიგელები გადასცა იერუსალიმის როდოსისა და მალტის წმინდა იოანეს სახელობის ჰოსპიტალიერთა სუვერენული სამხედრო ორდენის პრინცს და დიდ მაგისტრს ფრა ჯონ დანლაპს
2025 წლის 17 ნოემბერს, წმინდა საყდართან (ვატიკანი) საქართველოს საგანგებო და სრულუფლებიანმა ელჩმა, დავით მექვაბიშვილმა რწმუნებათა სიგელები გადასცა იერუსალიმის როდოსისა და მალტის წმინდა იოანეს სახელობის ჰოსპიტალიერთა სუვერენული სამხედრო ორდენის პრინცს და დიდ მაგისტრს ფრა ჯონ დანლაპს. ოფიციალური ცერემონიის დასრულების შემდეგ გაიმართა ელჩის შეხვედრა მალტის ორდენის დიდ მაგისტრთან.
შეხვედრაზე საუბარი შეეხო საქართველოსა და მალტის სუვერენულ ორდენს შორის არსებულ თანამშრომლობას და მეგობრულ ურთიერთობებს. განსაკუთრებული ყურადღება გამახვილდა ჯანმრთელობის დაცვის და სოფლის მეურნეობის სფეროებში თანამშრომლობის კიდევ მეტად გაღრმავების შესაძლებლობებზე. მალტის სუვერენული ორდენის ხელმძღვანელმა წარმატებები უსურვა ელჩს მომავალ საქმიანობაში.
რწმუნებათა სიგელის გადაცემის საზეიმო ცერემონია მალტის სუვერენული ორდენის რომის ცენტრში მდებარე ისტორიულ მაგისტრალურ სასახლეში გაიმართა.