20-21 აპრილს, ვატიკანში საქართველოს საელჩოს ორგანიზებით ქართული დამწერლობისადმი მიძღვნილი ღონისძიება გაიმართა
20-21 აპრილს, ვატიკანში საქართველოს საელჩოს ორგანიზებით ქართული დამწერლობისადმი მიძღვნილი ღონისძიება გაიმართა, რომელსაც „დანტე ალიგიერის საზოგადოებამ“ მის სათავო ოფისში, ფლორენციის სასახლის ისტორიულ შენობაში უმასპინძლა. ღონისძიების პირველი ნაწილი დაეთმო პრეზენტაციას ქართული ენისა და ანბანის შესახებ. დამსწრე საზოგადოებას ქართული დამწერლობის სამი სახეობა გააცნო ქართველმა მეცნიერმა, ფილოლოგმა, მთარგმნელმა, ნეაპოლის სახელმწიფო უნივერსიტეტ „ლ’ორიენტალეს“ ქართული ენისა და ლიტერატურის პროფესორმა გაგა შურღაიამ. პარალელურად გაიმართა ქართველი მხატვრისა და კალიგრაფის გიორგი სისაურის გამოფენა‘’ სამოთხის შეხება’’, რომლის ფარგლებშიც წარმოდგენილი იყო 38 საზედაო ასო მისი უნიკალური კოლექციიდან‘’ანბანთქება’’ და სახარებისეულ თემაზე შექმნილი 19 მინიატურა.
ღონისძიებას ვატიკანში აკრედიტებული დიპლომატიური კორპუსისა და რომის კურიის წარმომადგენლები, ასევე იტალიის რესპუბლიკაში სამუშაო ვიზიტით მყოფი, საგარეო საქმეთა მინისტრი, ილია დარჩიაშვილი, დაესწრო. ღონისძიების დასასრულს გაიმართა გიორგი სისაურის მასტერკლასი და მიღება, რომელზეც დამსწრე საზოგადოებას ქართული ღვინისა და კერძების დაგემოვნების შესაძლებლობა მიეცა.საქართვრლოს საელჩო მადლობას უხდის ღონისძიების ორგანიზებაში გაწეული პარტნიორობისთვის გადამზიდავ კომპანია Inex Group-ს.